Elseid Hysaj ishte një ndër lojtarët e Napolit që krijoi shumë zhurmë në merkaton e verës, por klauzola e tij 50 milionë euro bëri që asnjë nga ekipet e mëdha të mos e paguante. Por edhe dëshira e mbrojtësit shkodran ishte që të vazhdonte sërish me napolitanët të cilët pas largimit të Sarrit në stol morën Carlo Ancelottin.
“Calciomercato.com” ka zbuluar se futbollisti i kombëtares shqiptare ka nisur bisedimet me klubin për rinovimin e kontratës dhe janë shumë pranë nënshkrimit. E veçanta është se shqiptari nuk do të ketë një klauzolë në rast transferimi. Kjo pikë është kërkuar nga vetë Hysaj.
Pas kontakteve të vazhdueshme me menaxherin e mbrojtësit, Napoli duket se do të hartojë një marrëveshje të re. Kontrata që ka aktualisht Hysaj skadon në vitin 2021 dhe Napoli nuk ka ndërmend ta lërë të lirë, por dëshiron ta shtyjë edhe me 2 vite.
24-vjeçari është aktualisht i grumbulluar me kombëtaren e Shqipërisë për ndeshjen që do të zhvillohet ditën e nesërme në kuadër të Ligës së Kombeve kundër Izraelit. Chelsea ishte skuadra që dëshironte ta kishte Hysajn në ekip, por Sarri nuk arriti ta merrte me vete mbrojtësin e djathtë.
