Avokati i ish-ministrit të Brendshëm Saimir Tahiri, Maks Haxhia ka folur në “Top Story” pas publikimit në Top Channel të një materiali, i cili fliste se Tahiri mund të ketë falsifikuar dokumentet për pafajësinë e tij. Në dosjen e “Habilajve”, në materialet e përgjimeve përmendet një person me emrin Saimir, por ende nuk është konfirmuar nëse ka lidhje me ish-ministrin e Brendshëm Saimir Tahirit.
Avokati, Maks Haxhia i tha “Top Story-t” se letra e paraqitur nga ish-ministri në datë 24 tetor, nuk ka vlerë juridike.
“Nuk ka vlerë juridike. Letra që kemi marrë ne nuk është për të vërtetuar dhe paraqitur procedurialisht në formën e kërkuar. Nëse do të vinte rasti për ta bërë këtë, do t’i drejtoheshim titullarit të institucionit të Prokurorisë së Katanias”-ka theksuar Haxhia.
Avokati Haxhia ka shpjeguar ndryshimin, sipas tij, të letrës së bërë publike nga Saimir Tahiri më 24 tetor dhe letrës së publikuar nga Top Channel në edicionin qendror të kësaj të mërkure.
“Ka dy mënyra sesi tërhiqet një letër. Letra juaj (Top Channel) është marrë nga titullari i institucionit, kurse letra jonë është marrë nga sekretaria e institucionit. Kur merret nga titullari është ndryshe, kurse ky i yni ishte një dokument i marrë në Sekretarinë e Prokurorisë së Katanias”-shpjegoi Haxhia.
Avokati i ish-ministrit të Brendshëm, ka treguar se gjithkush mund të marrë një vërtetim në lidhje me një çështje të këtillë.
