Athina zyrtare ka ulur tonet lidhur me shembjen e disa objekteve në Himarë, duke vënë si kusht të vetëm kompensimin e plotë të atyre që iu është cenuar prona.
Megjithatë, opozita greke është kundër këtij qëndrimi, duke akuzuar se po shkelen të drejtat e minoritetit grek.
Jo vetëm kaq, por kreu i Demokracisë së Re, Kyriakos Mitsotakis ka kërkuar që çështjen ta marrë në dorë Brukseli dhe i ka dërguar një letër eurokomisionerit Hahn.
Në letër, ai kërkon që Hahn të ndërhyjë ndaj qeverisë shqiptare, duke e cilësuar procesin e shembjes së disa godinave si “një kulmim të përpjekjeve të autoriteteve shqiptare për të shkelur të drejtat e minoritetit etnik grek”.
Ndërkohë, reagimi i deputetit të Agimit të Artë, Kristos Papas ka qenë edhe më i ashpër, pasi ka kërkuar që avionët luftarakë F16 të bëjnë një fluturim të ulët në Himarë që t’i jepet një mesazh qeverisë shqiptare.
Sipas kreut të Bashkisë së Himarës, Jorgo Goro, pas githckaje ka vetëm manipulime me sfond politik:
“Të them të drejtën, përjashtuar forcës politikë që i ngriti njerëzit, vetëm personat që dëmtohen nga prishjet e objekteve të tyre, sepse po të shikoni me vëmendje edhe në tablotë e prishjeve kanë qenë 2 procese. Në njërën anë prishej karburanti dhe në anën tjetër prishej një objekt tjetër. Në njërin objekt nuk kishte fare persona, në objektin tjetër ishin rregulluar protestues nga forca politike”, ka thënë Goro, duke pretenduar se banorët fare mirë e kanë të qartë se ç’po ndodh, pasi ka dy vjen që janë njohur me projektin.
