Vetëflijohet bashkëshortja e gjyqtarit të Krimeve të Rënda, Dritan Hallunaj. Burimet e para bëjnë me dije se gruaja e gjyqtarit, Enkelejda Hallunaj, është hedhur nga kati i tetë i pallatit dhe ka gjetur vdekjen e menjëhershme.
Enkeleda Hallunaj, bashkëshortja 37-vjeçare e gjyqtarit të Krimeve të Rënda, Dritan Hallunaj, mësohet se ka rënë nga kati i 8-të i pallatit ku banonte, në kryqëzimin mes rrugës “Nikolla Tupe” dhe “Vaso Pasha”, në zonën e ish-Bllokut.
Momentalisht nuk dihen ende rrethanat e kësaj ngjarjeje të rëndë. 37-vjeçarja është nënë e një vajze, dhe me profesion stomatologe.
“Më datë 02.08.2018, rreth orës 13:16, në rrugën “ Nikolla Tupe”, dyshohet të jetë hedhur nga ballkoni i pallatit, shtetasja E. H., rreth 37 vjeçe, e cila ka gjetur vdekjen e menjëhershme”, thuhet në deklaratën e policisë.
Po punohet për sqarim të mëtejshëm të rrethanave të ngjarjes.
Dritan Hallunaj është konfirmuar ditën e djeshme nga KPK. Paraditen e kësaj të mërkure, Komisioni i Pavarur i Kualifikimit ka konfirmuar në detyrë Dritan Hallunajn.
ILDKPKI-ja në raportin e saj thoshte se deklarimi i pasurive të gjyqtarit të Krimeve të Rënda është i saktë, i justifikuar dhe nuk ka fshehje pasurie.
