Policia e Kosovës ka arrestuar mëngjesin e sotëm katër persona, të cilët dyshohen se kanë pasur lidhje me vrasjen e Oliver Ivanoviç. Aksioni është zhvilluar në veri të Mitrovicës.
“Mund të konfirmojmë se, në Veri të Mitrovicës, me urdhëresë të Gjykatës kompetente, janë realizuar disa bastisje që ndërlidhen me vazhdimin e hetimeve për rastin e vrasjes se O.I.. Njësitet policore kanë kryer bastisje në katër lokacione si dhe kane ndaluar katër persona, tre që ndërlidhen me hetime për rastin dhe një i cili ka rezistuar ndaj zyrtarëve policor. Në konsultim me Prokurorin kompetent ndaj të njëjtëve është duke vazhduar procedura e mëtutjeshme ligjore. Për informacione tjera do të iu informojmë pas përfundimit dhe kompletimit të rastit”, thuhet në përgjigjen e policisë për mediat kosovare.
Nën pranga kanë mbetur Sasha Quriçic dhe Milosh Roshic dhe Dragisa Markovic. Dragisha Markovic është një nga të arrestuarit. Ai ishte pjesëtar i policisë së Kosovës që po punonte në hetimet për vrasjen e Ivanoviçit.
Lideri i Iniciativës Qytetare “Serbia, Demokracia dhe Drejtësia” Oliver Ivanoviç u vra nga të shtënat ndaj tij në Mitrovicë mëngjesin e 16 Janarit.
