Organizata e Kombeve të Bashkuara pas një hetimi të kryer, ka arritur në përfundimin se gjatë sulmeve kimike të 4 prillit në Siri është përdorur gazi nervor vdekjeprurës Sarin, ku mbetën të vdekur më shumë se 90 persona.
Ambasadorja e SHBA-së në OKB, Nikki Haley tha se raporti “konfirmon atë që tashmë e dimë: armët kimike janë përdorur kundër popullit sirian”.
“Tani që e dimë të vërtetën e pamohueshme, ne do të nisim hetime të pavarura për të konfirmuar se kush saktësisht ka qenë përgjegjës për këto sulme brutale në mënyrë që të kërkojmë drejtësi për viktimat”, ka shtuar ajo, e cituar nga mediet ndërkombëtare.
Raporti i Organizatës për Ndalimin e Armëve Kimike do të përdoret nga një grup hulumtuesish të OKB-së, për të identifikuar sulmuesit.
Krimi çnjerëzor në qytetin Khan Sheikhoun u kthye në një shqetësim ndërkombëtar, pas pamjeve makabër ku shiheshin fëmijët duke vdekur para objektivit të kamerave.
Pak ditë më parë Uashingtoni ka njoftuar se ka të dhëna se Siria mund të jetë në përgatitje të një tjetër sulmi kimik, duke e paralajmëruar atë se do të paguajë “çmim të rëndë” nëse guxon sërish.
