Ditën e sotme janë bërë të ditur detaje të reja mbi hetimin dhe arrestimin e Tesi Basho, i akuzuar për krime në Itali dhe në vendin tonë. Sipas “BalkanWeb”, Basho pasi është arratisur nga burgu i sigurisë së lartë në Romë, ka hyrë ilegalisht në Shqipëri. Këtu e ka zanafillën dhe aktiviteti i tij kriminal. Në 2017 ai kërcënoi me jetë një biznesmen, të cilit i kërkonte 100 mijë euro.
Me ndihmën e vëllait Santilo Basho arriti t’i merrte biznesmenit 20 mijë euro. Mësohet se dy vëllezërit Basho dhe biznesmeni kanë marrëdhënie familjare me njëri-tjetrin.
Bëhet me dije se takimet mes biznesmenit dhe Bashos u përgjuan, ndërsa paratë u fotografuan. Në atë kohë Santilo Basho nuk u ndalua, pasi prokuroria donte të arrinte tek Tesi Basho.
Pas disa aksioneve, një muaj më parë policia arrestoi dy vëllezërit. Tesi Basho krahas akuzave të rënda që ka në Itali po hetohet edhe për gjobëvënie ndaj biznesmenit bashkë me vëllain.
Sot Tesi Basho ka pasur seancën e marrjes në pyetje te të dyshuarit. Bëhet me dije se ai ka refuzuar të vinte në seancë dhe procesi vijoi në mungese të tij. Në përfundim të seancës Gjykata e konfirmoi arrestin me burg për 38-vjeçarin.
