Inter luajti ndeshjen më të rëndësishme të sezonit, por “iu drodhën” këmbët dhe nuk arriti të dalë me tre pikë nga “San Siro”. Kjo do të thotë se shanset për të marrë pjesë në Champions League sezonin e ardhshëm të bëhen deri diku të pamundura. Zikaltrit janë mposhtur 2-1 ndaj Sassuolo-s në javën e parafundit të Serie A. Inter e nisi shumë keq ndeshjen, me Sassuolo që luante më bukur duke ndërtuar aksione të rrezikshme për të shënuar.
Brozoviç shkakton një faull në hyrje të zonës, i cili rezulton fatal. Politano ekzekuton në mënyrë perfekte duke e gjuajtur topin poshtë murit mbrojtës dhe topi ndalet në rrjetë, një goditje mjaft e rëndë për Interin.
Në fund të pjesës së parë Icardi ka mundësinë më të mirë për të barazuar rezultatin por portieri Consigli bën mrekullinë. Pas pushimit është vetëm një ekip që luan, dhe ai është Inter. Por rastet e humbura nga vendasit janë për t’u habitur. Edhe lojtarë amatorë do të kishin bërë më mirë. Perisic dhe Icardi nuk janë në formë dhe kjo duket nga një tjetër rast i pastër i humbur nga argjentinasi.
Dhe në daljen e vetme të vizititorëve vjen goli i dytë me anë të Berardi-i i cili me një të djathtë fantastike dërgon topin në trekëndësh. Inter hidhet në sulm dhe Rafinha i jep shpresë vendasve me një gol të bukur në hyrje të zonës. Minutat e mbetura janë dramatike dhe Inter vazhdon të krijojë raste për gol por Sassuolo luan me mish e me shpirt dhe arrin të marrë një fitore që nuk i vlen për asgjë.
