Milani është ndalur në barazimin 2-2 ditën e sotme përballë Beneventos e cila regjistroi pikën e parë, pas 14 humbjesh radhazi. Por e veçanta e gjithë këtij barazimi ishte mënyra se si rrodhën ngjarjet. Kur ishte aksioni i fundit që do të zhvillohej, Benevento kishte në dispozicion një goditje dënimi. Pankina i kërkon portierit Brignoli të shkojë në zonë dhe ashtu ndodh. Është pikërisht portieri që godet me kokë dhe sjell golin e barazimit të çmendur që mund të bëj kthesën në Serie A për ekipin e Beneventos.
“Jo se nuk besoja se do shënoja, por kishte një probabilitet shumë të vogël që të bëja diçka të tillë. Jam i kënaqur për të gjithë, por më veçanërisht, për presidentin, që na ka qëndruar gjithmonë pranë. 30 sekondat e fundit? Nga stoli më thanë që të shkoja tek porta e Milanit. Unë shkova, mbylla sytë kur pashë topin që po vinte dhe kërceva si portieri, jo si një sulmues, dhe realizova një gol të çmendur” – deklaroi Alberto Brignoli.
