Fredi Beleri ka dëshmuar para togave të zeza, gjatë seancës së sotme ku do të vendoset fati i tij.
Ai ka theksuar se qëllimi i burgosjes së tij është që kryeministri Edi Rama të zhvillojë zgjedhje të reja në Himarë.
Por, Beleri paralajmëroi se “Rama do të zhgënjehet, Himara nuk do ta votojë atë”. Kryebashkiaku i zgjedhur, i cili kandidoi nën logon e koalicionit “Bashkë Fitojmë”, deklaroi se ishte i pafajshëm dhe se “herët ose vonë, do ta gjej drejtësinë time”.
“Fredi Beleri gjatë seancës është shprehur se nuk është pranuar asnjë kërkesë e Belerit dhe asnjë provë e paraqitur prej tyre. Ai është shprehur se janë përdorur thëniet e një personi të dënuar për mashtrim, si është i infiltruar i policisë Arsen Rama. Gjithashtu ka deklaruar se janë përdoruri dëshmi penaliteti të falsifikuara. Ai tha që kjo çështje ka qenë, është dhe do të mbetet thjesht politike, është gjyq publik. Ai pretendoi se është shkelur prezumimi i pafajësisë, ka patur gjyq publik për të dhe nuk është zhvilluar proces i rregullt gjyqësore. Po ashtu ka pretenduar se është ndodhur përpara një diskriminim.
Iu është drejtuar gjyqtarëve duke thënë se “duhet t’i thoni jo presionit të pushtetit, shërbejini vetëm drejtësisë”.
Ai është shprehur se qëllimi i arrestimit dhe mbajtja në burg sa më gjatë është për ti dhënë kohë kryeministrit të vendit për të zhvilluar zgjedhje të reja në Himarë.
Por Fredi Beleri ka shtuar se “ai do të zhgënjehet, Himara nuk do ta votojë atë. Nuk e ndjej veten fajtor për asnjë akuzë. Herët ose vonë, do ta gjej drejtësinë time”.
Pas përfundimit të fjalës së mbrojtjes, ku kërkoi pushimin e çështjes pasi nuk ka kryer asnjë vepër penale, personat e pranishëm në sallë duartrokitën”, raportoi gazetarja Klodiana Lala.
Prokuroria e Posaçme (SPAK) ka kërkuar 2.6 vite burg për kryebashkiakun e zgjedhur të Himarës. Ndërsa për Kokaveshin ka kërkuar dënimin me 2 vite burg, të konvertuar në 4 vite shërbim prove, shkak të problemeve shëndetësore.
