Themeluesi i gazetës “Mapo”, Henri Çili, ka njoftuar shitjen e kësaj gazete dhe të gjitha botimeve që mbajnë logon MAPO. “Nga sot gazeta MAPO dhe botimet e tjera MAPO shkojnë drejt një projekti të ri menaxherial, drejt një forme të re të organizimit juridik dhe sigurisht drejt një pronësie të re” shkruan Cili përmes një editoriali botuar sot.
Mësohet se blerësi i gazetës MAPO në print, online dhe të gjitha botimeve të tjera MAPO pritet të bëhet, kryetari i bashkisë së Rrogozhinës, Beqir Nuredini, pronar i kompanisë së reklamave Univers. Nuredini është i zgjedhur nën siglën e PDIU. Vitin e shkuar atij iu bllokua pasaporta për efekt të hetimeve të nisura për tjetërsimit të pronave në zonën e Spillesë në kuadër të aksionit policor të koduar ““Ranishjta 2“.
Një burim pranë negociatave të kësaj shitje thonë se interesimi i Beqir Nuredinit për të blerë botimet MAPO ka lindur disa muaj më parë. Për këtë ai pajtoi një kompani auditi ndërkombëtare, e cila bëri një vlerësim paraprak të situatës financiare gazetës dhe botimeve të tjera MAPO. Vetë Beqir Nuredini i kontaktuar, nga Shqiptarja.com nuk i mohoi tratativat për të blerë gazetën MAPO por tha se transaksioni final i blerjes nuk ka përfunduar ende.
“Shqiptarja.com” shkruan se të dhënat e para për blerjen e MAPO sugjerojnë se shuma që Nuredini është i gatshëm të paguajë mbi 400.000 euro. Është e paqartë përse Beqir Nuredini, ka zgjedhur të investojë, në median e shkruar në një kohë kur shitjet e gazetave në Shqipëri sikurse edhe në shumë vende të Europës, përballë zhvillimeve të mediave dixhitale vitet e fundit kanë pësuar një rënie drastike.
