Një ditë më parë kanë përfunduar në spital 19 nxënës të shkollës së Postribës, pjesë e bashkisë Shkodër. Ata kanë shfaqur shenja helmimi, ku mendohet se kanë ardhur si pasojë e konsumimit të ushqimit nga një kioskë fast-foodi aty afër. Po kështu nuk përjashtohet edhe konsumimi i ujit të pijshëm në shkollë.
Pasi kanë shkuar në shtëpi, fëmijët kanë ndjerë shqetësime, dhe i janë drejtuar urgjencës së spitalit rajonal të Shkodrës, dhe më pas repartit infektiv duke marrë mjekim. Mjeku i urgjencës në spitalin e Shkodrës, Astrit Lahi, tregon se deri mbrëmë janë paraqitur 15 raste, por sipas burimeve, ky numër është rritur në orët në vijim. Mjeku Lahi tregon se arsyeja e ardhjes së këtyre nxënësve nga Postriba është pikërisht helmimi, raporton “Panorama”.
Simptomat e nxënësve që kanë shkuar në spital janë temperaturë e lartë, të vjellat dhe disa shqetësime të tjera që vijnë pikërisht nga helmimi. Mjeku Lahi shprehet se rastet e helmimit në spitalin e Shkodrës kohët e fundit kanë ardhur duke u rritur, dhe kjo vjen si shkak i pasigurisë në ushqime, por sipas tij, edhe mungesës së higjenës.
Pas njoftimit për këtë rast, në spitalin e Shkodrës kanë mbërritur një sërë strukturash, si efektiv të policisë, Autoriteti Kombëtar i Ushqimit, Inspektoriati Shtetëror Shëndetësor dhe Prokuroria për të hetuar.
