Banorët e Deçanit janë helmuar nga uji i pijshëm. Prej së dielës, afro 2 mijë qytetarë të Komunës së Deçanit kanë shfaqur shenja helmimi, e që dyshohej se kanë ardhur nga uji i pijshëm.
Kryetari i kësaj komune, Bashkim Ramosaj ka bërë një postim në Facebook, ku ka shkruar se “Po merr fund “misteri”, populli nuk ja huq kurrë”.
I kontaktuar nga “Telegrafi” dhe i pyetur se ky postim a ka të bëjë që qytetarët janë helmuar nga uji, Ramosaj është përgjigjur “saktë, informacionet bëhen publike në orën 16:00”. “Telegrafi” mëson se analizat e tjera të ujit që janë kryer, kanë rezultuar se uji ka qenë me baktere.
Deçani është në gjendje të jashtëzakonshme, ndërkohë që nga dita e shtunë e deri më sot në Qendrën e Mjekësisë Familjare në Deçan kanë kërkuar ndihmë shëndetësore mbi 1 mijë pacientë.
