Gjatë 24 orëve të fundit në Komunën e Deçanit kanë humbur jetën dy persona, ndërsa dyshohet se shkak mund të jetë bërë uji i pijshëm. Zëdhënësi i Prokurorisë Themelore në Pejë, Shkodran Nikçi, i ka cilësuar si “vdekje të dyshimta”.
“Gjatë 24 orëve të fundit, kanë ndodhur dy vdekje të dyshimta në komunën e Deçanit. Për shkak të situatës se krijuar në atë rajon, Prokurori kujdestar i Departamentit të Krimeve të Rënda, ka urdhëruar që trupat e pajetë të dërgohen për obdukim në IML për të kuptuar me shumë lidhur me rrethanat e vdekjes se tyre”.
Komuna e Deçanit po planifikon që të furnizojë qytetarët e saj me ujë të pijshëm, pasi dyshohet se helmimi i rreth 900 qytetarëve ka ardhur nga uji që ata kanë konsumuar.
Kryetari i Komunës së Deçanit, Bashkim Ramosaj tha për ‘Telegrafin’ se janë duke u përgatitur që të furnizojnë me ujë qytetarët.
“E kemi tash një takim, ku Komuna do të marrë përgjegjësinë që të furnizojë me ujë qytetarët përmes zgjidhjeve të ndryshme, ndoshta edhe me blerje të ujit”, tha Ramosaj.
