Drejtori i Zyrës për Kosovë në Qeverinë serbe, Marko Gjuriç hedh akuza ndaj politikës së Prishtinës lidhur me helmimin e 26 zyrtarëve nga zarfet e ardhura me vota nga Serbia.
Gjuriç thekson se po synohet përçarja mes serbëve, ndërsa shton që po përgatitet manipulimi me votat e serbëve në Kosovë. Sipas tij, këto përpjekje po bëhen që në Kuvendin e Kosovës të futen aleatët serbë të Albin Kurtit dhe jo kundërshtarët e tij.
“Nga kjo çfarë ndodhi sot duhet parë të gjithë se çfarë budallenjsh shovinistë në Prishtinë merren me politikë, dhe e gjithë kjo bëhet që serbët prapë rrejshëm të akuzohen dhe të ekspozohen ndaj urrejtjes, me qëllim që nga mllefi i katastrofës zgjedhore të nxirren Rada Trajkoviq dhe kandidatët tjerë të Kurtit”, tha Gjuriç gjatë një komunikimi për mediat.
Gjatë ditës së sotme 26 persona dyshohet se janë helmuar në QNR nga zarfet e ardhura me vota nga Serbia.
QKU ka njoftuar se 9 pacientë i përkasin gjinisë femërore, dy prej tyre shtatzënë. Ndërkohë gjendja shëndetësore e të gjitha këtyre pacienteve sipas QKUK-së raportohet të jetë e qëndrueshme.
