Emri i belgut, Eden Hazard ishte mjaft i lakmuar në merkaton e verës, pasi kërkohej nga gjigantët e Real Madrid, por Chelsea i vendosi një çmim 200 milionë euro dhe gjithçka ngriu. Por Hazard akoma nuk është i bindur për të qëndruar te londinezët në Premier League dhe mundësia e largimit nga “Stamford Bridge” sa vjen dhe bëhet më reale.
Eden Hazard është duke luajtur sezonin e tij të fundit me fanellën e Chelsea-it. Sulmuesi belg ka refuzuar edhe njëherë propozimin që i ka bërë klubi londinez për të rinovuar kontratën aktuale e cila skadon në vitin 2020. Këto refuzime të njëpasnjëshme të Hazard e kanë një arsye dhe kjo arsye është Reali i Madridit.
28-vjeçari dëshiron të largohet nga Blutë e Londrës për t’u bashkuar me Los Blancos dhe sipas të gjitha gjasave për të mos e humbur me parametër zero në vitin 2020, Chelsea do ta shesë në merkaton e verës së ardhshme. Reali i Madridit nga ana tjetër është gati të ofrojë 100 milionë eurot e kërkuara nga londinezët për të lënë të lirë yllin e tyre.
