“Ish-ministri i Transporteve, Edmond Haxhinasto si dhe drejtori aktual i ARRSH-së, Afrim Qendro, do të thirren në ditët në vijim në prokurori për të sqaruar pozicionin e tyre lidhur me aferën e rrugës Tiranë-Elbasanˮ, deklaroi Anila Hoxha, gazetarja e kronikës në Top Channel.
E ftuar në emisionin “Të pa Ekspozuarit”, gazetarja Hoxha sqaroi se do të jenë edhe persona të tjerë ata që do të thirren në prokurori javën e ardhshme.
“Pritet të thirret edhe ish-ministri Haxhinasto javën e ardhshme pasi grupi i hetimit do të largojë dyshimet nëse Haxhinasto ka reaguar apo jo nga raporti i KLSH-së. Gjithashtu, Haxhinasto është në verifikim ndërsa pritet të thirret edhe drejtori aktual i ARRSH-së, Afrim Qendro dhe persona të tjerë,“ deklaroi Hoxha.
Një ditë më parë Gjykata e Krimeve të Rënda në Tiranë ka vendosur masën e sigurisë “arrest me burg” për ish-drejtorin e Autoritet Rrugor, Dashamir Xhika dhe dy ish-vartësit e tij, Aksel Qurduka dhe për Albens Alite.
Sipas Prokurorisë, këta persona në bashkëpunim më njëri-tjetrin dhe persona të tjerë, të cilët po hetohen, dyshohet të jenë pjesë e skeme korruptive, e cila i ka sjellë buxhetit të shtetit të paktën 54 milionë dollarë dëme.
Hetuesit kanë sekuestruar nga Autoriteti Rrugor dhe Ministria e Transporteve të gjitha praktikat e ndjekura për ndërtimin e autostradës Tiranë-Elbasan, për të parë nëse përputhen punimet që janë kryer, me paratë që kanë dalë nga buxheti.
Prokuroria i ka shtrirë hetimet edhe në Ministrinë e Transporteve dhe priten arrestime të ish-zyrtarëve të tjerë. Prokuroria ka në tavolinë dy kallëzime të bëra
