Për ish-Zëvedësministren e Punëve të Jashtme, Edith Harxhi, z. Gent Cakaj mbetet një djalë simpatik. Ajo ka deklaruar se për Ministrinë e Jashtme do duhej një figurë më e konsoliduar në aspektin jo vetëm të politikës së jashtme dhe të diplomacisë, por edhe në njohuritë e politikës së brendshme të Shqipërisë. E ftuar në studion e lajmeve të “Ora News”, Harxhi vlerësoi punën e Cakaj, por ajo solli në fokus edhe hapjen e negociatave. Edith Harxhi e sheh me mëdyshje emrin e tij, pasi do të duhej një njeri me eksperiencë shumë të madhe me BE, por edhe në polikën e brendshme të Shqipërisë.
“Personalisht e njoh z. Caka, është një djalë i ri simpatik nga Kosova, i cili ka shërbyer mjaft mirë këtu mendoj unë, kur ka punuar në kabinetin e kryeministrit Rama.
Mesa di unë ai ka qenë këshilltar pranë kryeministrit, ka pasur dhe një pozicion kyç shumë të rëndësishëm që në SHBA është shumë i rëndësishëm, shkrimi i fjalimeve diplomatike të një kreu shteti që janë shumë të rëndësishme.
Nuk mundet kurrë të akuzoj dikë që është emëruar në këtë pozicion, për arsye sepse ai ose ajo është nga Kosova.
Përkundrazi, mendoj se është një gjë shumë e madhe, shumë e mirë që dikush të jetë nga Kosova dhe të emërohet. Por në këto momente që është Shqipëria, do të duhej një figurë më e konsoliduar në aspektin jo vetëm të politikës së jashtme dhe të diplomacisë, por edhe në njohuritë e politikës së brendshme të Shqipërisë, por edhe në njohuritë e rajonit në të njëjtën kohë. Sepse këto do të jenë pikat kryesore të një Ministri të Jashtëm të Shqipërisë.
Së dyti, jemi para një sfide, hapja e negociatave në BE. Ministri i Jashtëm, kushdo që të jetë, duhet të marrë parasysh që do të drejtojë jo vetëm ekipin negociator, megjithëse z. Cakaj është emëruar si kryenegociator para disa muajsh nga Rama. Edhe këtë e shoh me dyshim, sepse do të duhej një njeri me eksperiencë shumë të madhe me BE, por edhe në politikën e brendshme të Shqipërisë. Është pozicioni kyç i shtetit shqiptar pas atij të kryeministrit, sidomos në këto momente kur ka sfida të tilla”.
