Harry Kane duket se është i gatshëm të largohet nga Spursat në rast se ata nuk do të forcojnë ekipin që të jetë në gjendje të fitojë trofe. Në deklaratën e fundit për mediat ylli i Tottenham është shprehur tërthorazi se ai edhe mund të ndërpresë rrugëtimin e tij tek anglezët nëse nuk plotësohen këto kritere. “Nuk është e vërtetë se ne jemi në bisedime për të rinovuar kontratën. Unë dëshiroj që Tottenham të forcohet dhe të jetë në gjendje për të fituar tituj, në këtë rast do të isha plotësisht i kënaqur nga ekipi”, është shprehur Kane. 
Sa i përket lëvizjeve të bujshme në merkato si ajo e Philipp Coutinho drejt Barcelonës, golashënuesi më i mirë i viti është i mendimit se lojtarët që dëshirojnë të largohen nuk kanë pse pengohen nga ekipi. “Mendoj se nuk është e drejtë që klubet të pengojnë transferimin e ndonjë lojtarë, nëse ai vërtet dëshiron të largohet. Pasi kjo do të ndikojë në formën e tij dhe nuk do të arrijë të japë më në fushë më të mirën”, përfundoi Kane.
Dëshira e Tottenham është që të rinovojë me Harry Kane deri në vitin 2023 dhe me një rrogë javore prej 200 mijë paund. Por 24-vjeçari duket se ka disa kritere që të plotësojë që ai të mos mendojë largimin, pasi si objektiv ai tani ka të fitojë trofe. Edhe pse deklaratat e tij janë bërë në mënyrë të tërthortë , duket se Kane po jep sinjale se kohës së tij tek skuadra e gjelave po i afron fundi. Sulmuesi është një ndër objektivat e Realit të Madridit që ka shfaqur probleme në këtë sezon në vijën sulmuese.
