Kryetari i Komisionit Shtetëror për Demarkacionin me Malin e Zi, Shpejtim Bulliçi publikoi dhe paraqiti të gjitha gjetjet para deputetëve të Komisionit për Integrime Evropiane. Pas prezantimit qeveria e Kosovës ka theksuar se nuk e komenton raportin.
Këshilltari për median i kryeministrit, Halil Matoshi tha se qeveria është në pritje të raportit përfundimtar nga ana e komisionit të drejtuar nga Bulliçi.
“Ne ende nuk kemi ndonjë qëndrim zyrtar, pasi që Qeveria nuk përzihet në raportime ose në debate parlamentare, si ky që është mbajtur sot nga ana e Komisionit Shtetëror për Demarkacionin në Komision për Integrime Evropiane. Qeveria pret raportin zyrtar me të gjeturat e këtij komisioni dhe pastaj do të deklarohemi”, ka thënë Matoshi për Gazeta Blic. Matoshi ka thënë se para krishtlindjeve ka gjasa që komisioni shtetëror të paraqes kryeministrisë të gjeturat e tij.
