Kryeministri kosovar Ramush Haradinaj është shprehur se Kosova do të krijojë shumë shpejt ushtrinë e saj në partneritet me NATO-n dhe synimi është që deri në vitin 2020, të bëhet anëtare e aleancës më të fuqishme ushtarake të globit.
Gjatë konferencës ndërkombëtare me temë “NATO dhe Ballkani Perëndimor-Dinamikat regjionale, Haradinaj vuri theksin në rolin e aleancës veriatlantike në parandalimin e luftës dhe ekstremizmit dhe ndihmën e dhënë sigurisë nëpër botë.
Sipas tij, Kosova e kërkon sa më shpejt anëtarësimin në NATO dh pret që kjo të ndodhë brenda fundit të kësaj dekade. “Themelimi i Forcave të Armatosura të vendit do të kontribuojë në stabilitetin e Europës”, tha Haradinaj.
Ndërsa në fjalën e tij, kryetari i Kuvendit Kadri Veseli kujtoi se kontributi i Kosovës për paqen dhe sigurinë ndërkombëtarë i kalon kufijtë e rajonit. “Në ato pak vite ekzistencë si shteti i pavarur dhe sovran, Kosova ka treguar përkushtim dhe efikasitet ndaj Aleancës globale kundër terrorizmit dhe kërcënimeve që vijnë prej ideologjive që e ushqejnë atë. FSK-ja ka arritur të gjitha kapacitetet e nevojshme për të dhënë kontributin e drejtpërdrejtë si anëtare e Aleancës Veriatlantike”, tha ai.
