Kryetari i PDK, Kadri Veseli dhe kryetari i AAK, tashmë i nominuar për kryeministër të Kosovës, Ramush Haradinaj, premtuan sot gjatë një takimi elektoral në komunën e Rahovecit, se, nëse ky koalicion do të fitojë zgjedhjet, hapi i parë që do merret, menjëherë pas formimit të qeverisë, do të jetë formimi i Ushtrisë së Kosovës.
Me këtë rast, kryetari Veseli tha:”Ne duhet të lëvizim përpara drejt integrimit në BE. Vendimmarrja e parë duhet të jetë transformimi i FSK në ushtri të Kosovës. Kjo është arsyeja pse jam shumë i lumtur të jem sot me mikun tim dhe kryeministrin e ardhshëm Ramush Haradinaj.Nga data 12 qershor ne do të fillojmë të kryejmë përgjegjësitë tona”.
Ndërkohë që investimet e huaja janë në nivelin më të ulët, kryetari i PDK-së ka thënë se duhet orientuar në zhvillimin ekonomik të vendit, ndërsa koalicionin e madh me AAK dhe Nisma e ka quajtur një koalicion pro-evropian dhe i cili nuk drejtohet kundër askujt.
Ndërsa Haradinaj foli rreth formimit të ushtrisë si dhe përsëriti edhe një herë se Kosova nuk ka tokë për të falur.
“Nuk mundemi më, si shtetas, me qenë të nëpërkëmbur edhe në vendin tonë, edhe jashtë. Duhet me nis ndryshe punën tonë dhe qëllimin tonë. Deri kur ne duhet të lejojmë që vendi ynë me mbet peng, ushtria për shembull e paformuar. Ju e dini se si kemi ardhur deri te kjo Kosovë dhe s’mundemi me falë tokë të këtij vendi. Nuk mund të vazhdojmë të tolerojmë. Kemi plot plagë të luftës, por nuk mund të qëndrojmë pa ushtri tonën. Unë e di se moralizojnë shumë sot për këtë vendim, por nëse është në interes të atdheut, unë gjithmonë do ta bëj. Ditën që do nisim punën, atë ditë mund të themi: ‘Bac, u kry’ “, ka thënë Haradinaj.
