Pas situatës së krijuar në Partinë Demokratike kur kreu i saj Lulzim Basha deklaroi se do të ngrijë funksionet e tij drejtuese deri në zgjedhjen e kryetarit të ri të kësaj force politike, kanë filluar të shfaqen edhe kandidaturat e para. Një ndër to është edhe ajo e ish-kryetarit të kësaj force politike pas viteve ’90 Eduard Selami. Përmes një postimi në Twitter, Selami ka bërë të ditur se do të kandidojë për kreun e Partisë Demokratike. Ai thekson se nëse vjen ai në krye të selisë blu do t’i kthejë asaj lavdinë e dikurshme.
Selami është një nga figurat që nuk i është bashkuar zërave kundër Lulzim Bashës, herë duke ndenjur neutral në pozicionin e tij dhe herë duke mbështetur kreun e PD-së.
Kur të gjithë eksponentët e rëndësishëm brenda PD-së i janë kundërvënë Bashës dhe kërkojnë dorëheqjen e tij për shkak të humbjes dërrmuese në zgjedhjet e fundit parlamentare, Selami shfaqet papritur për t’u rikthyer në drejtimin e kësaj force politike, i cili është pjesë e saj që prej themelimit.
‘‘Demokratë të nderuar, me ndjenjë përgjegjësie dhe synim për t’i rikthyer së bashku PD-së, lavdinë e merituar, shpall kandidaturën për Kryetar!’’, shkruan Selami në Twitter.
Demokrate te nderuar,
me ndjenje pergjegjesie dhe synim per t’i rikthyer se bashku PD, lavdine e merituar, shpall kandidaturen per Kryetar!— Eduard Selami (@SelamiEduard) June 27, 2017
