Kryesuesi i momentit në Formula 1, Hamilton ka folur për rivalin e tij kryesorë. Drejtuesi i Mercedes e ka vlerësuar shumë kundërshtarin kryesorë për titull.
Ish-kampioni i botës ka rezervuar disa batuta kundrejt rivalit të tij më “të frikshëm”, pilotin e Ferrarit Sebastian Vettel.
“Tek e fundit është fundamentale të kesh respekt për personat ndaj të cilëve garon, ndaj dhe respekti nuk mungon as për Vettelin”, thotë ndër të tjera Hamilton.
Vettel në garën e fundit në Singapor ka përfunduar jashtë që në startin e saj. Pas një gabimi amatoresk për një pilot të rangut të tij, ku i dha mundësinë Hamilton të shkëputet me 28 pikë dhe të ketë shanse reale për të firuar botërorin e F1.
“Sebastian është padyshim një pilot i pabesueshëm, sinqerisht e konsideroj si një ndër pilotët më të mirë me të cilët kam garuar unë, por edhe që kanë qenë në qarkullim në F1. Megjithatë, ishte diçka fantastike të shihja tek ai disa dobësi gjatë këtij sezoni. Madje i jam mirënjohës për atë që bëri në garën e fundit, në Singapor”, është shprehur britaniku i Mercedesit me doza tipike të humorit anglez.
Deklarata e Hamilton është bërë vetëm pak ditë përpara garës së radhës, atë të Malajzisë, që siç është njoftuar edhe më herët do të jetë hera e fundit që garohet në Sepang.
