Ditën e sotme u luajtën ndeshjet e fundit në Bundesligën gjermane, ku u vendosën fatet e disa skuadrave. Bayern Munich që kishte fituar titullin kampion disa javë më parë e mbylli në mënyrën më të shëmtuar këtë kampionat, pasi u shkatërrua në shtëpi nga Stuttgat me rezultatin e thellë 1-4.
HSV Hamburg, ekipi që nuk e kishte provuar ndonjëherë shijen e kategorisë së dytë, më në fund do ta provojë veten në Bundesliga 2 sezonin e ardhshëm. Megjithëse fitoi ndeshjen ndaj Borussia Monchengladbach, nuk mjaftoi për të siguruar një vend play-off pasi Wolfsburg ka mposhtur FC Koln.
Kishte vite që Hamburg i vërtitej rënies, dhe tani duhet të përballet me realitetin se nuk mund të krenohet më me faktin se nuk ka rënë ndonjëherë në kategorinë e dytë. Teksa kishin mbetur edhe dy minuta lojë, tifozët e Hamburg nuk e kanë kontrolluar veten dhe kanë djegur stadiumin duke detyruar forcat e shumta policore të futen në fushë për rreth 15 minuta derisa situata të qetësohej.
Kështu përveç Bayernit e Schalkes, në edicionin e ardhshëm të Champions League do të luajnë edhe Hoffenhaim e Borusia Dortmund, të cilat sot u përballën me njëra-tjetrën dhe të parët fituan me rezultatin 3-1. Nuk ia doli të luajë në Champions Bayer Leverkusen, pavarësisht fitores 3-1 ndaj Hannoverit.
Aspirinat grumbulluan po aq pikë sa Dortmundi, por verdhezinjtë siguruan vendin në Champions, falë golavarazhit më të mirë. Nga ana tjetër, Leverkusen do të duhet të kënaqet me një vend në Europa League, së bashku me Leipzigun, që fitoi në sfidën e sotme me rezultatin 2-6 ndaj Herthës.
