Pas shtatë humbjesh në shtatë përballjet e deritanishme mes tyre, tenistja rumune Simona Halep më në fund ka arritur të mposhtë rivalen ruse Maria Sharapova, në raundin e tretë të turneut Masters të Pekinit. Halep mundi 2-0 (6-2, 6-2) rivalen ruse, duke u hakmarrë edhe për humbjen që pësoi dy muaj më parë në grand slemin e US Open, ku u përballën që në raundin e parë.
Një ndeshje e dobët e Sharapovës, që nuk ishte në një ditë të mirë, duke bërë shumë gabime në fushë në të dyja setet. Ndërsa Halep bëri një ndeshje mjaft të mirë dhe falë këtij kualifikimi në turin tjetër sheh se mund të kapë më në fund kreun e renditjes botërore. Në rast se tenistja rumune arrin të fitojë në Masterin e Pekinit do të bëhet numri 1 në botë, për herë të parë në karrierë.
