Anëtari i Kryesisë së LDK-së, Haki Rugova, ka deklaruar se sot në Kuvendin e Kosovës do të votohet Qeveria Hoti. Në një prononcim për ‘Telegrafin’, ai ka thënë se i kanë numrat për formimin e Qeverisë.
“Unë e di që janë numrat, e di që do të mbahet seanca dhe e di që do të zgjidhet qeveria. Këto janë informacionet që i kam unë, dhe jam i bindur që sot do të formohet Qeveria”, ka thënë Rugova. Seanca për votimin e Qeverisë së re pritet të nis në orën 11:00.
Vendimi i Gjykatës Kushtetuese që i jep të drejtë presidentit për mandatarin e ri për krijimin e qeverisë, vazhdon të kundërshtohet dhe cilësohet i papranueshëm nga lëvizja ‘Vetëvendosje’, e cila në zgjedhjet e fundit doli e para.
Pas rrëzimit në Parlament të qeverisë Kurti, kjo parti kërkon zgjedhje të reja. Lëvizja ‘Vetëvendosje’ i kërkoi të hënën Gjykatës Kushtetuese “që në afat sa më të shpejtë dhe në format autentik”, t’i ofrojë të gjitha dokumentet, duke përfshirë edhe procesverbalet dhe transkriptet që pasqyrojnë procesin e shqyrtimit dhe të marrjes së vendimit nga ana e saj për dekretin e presidentit.
“Dekreti antikushtetues i presidentit, nuk mund të justifikohet përmes Kushtetutës së Republikës së Kosovës, ashtu sikurse aktgjykimi i Gjykatës Kushtetuese është vënë mbi Kushtetutën për ta arsyetuar presidentin. Andaj si palë në këtë rast, kërkojmë të njihemi me dokumentet që dëshmojnë se mbi çfarë baze është argumentuar ajo që nuk mund të argumentohej”, thuhet në kërkesën e ‘Vetëvendosjes’.
