Ish-drejtuesi i Prokurorisë së Apelit Tiranë, dhe njëherësh ish-kreu i Shoqatës së Prokurorëve, Shkëlqim Hajdari është shprehur se zgjedhja e një kryeprokurori të përkohshëm është shumë e rëndësishme.
Në një intervistë për “Report Tv”, Hajdari theksoi se qëkur prokurori Llalla erdhi në krye të Prokurorisë së Përgjithshme, gjithmonë synoi që të shkatërronte karrierën e shumë personave, të cilët e donin punën dhe e mbronin atë me dinjitet. Ndërsa shtoi se Llalla drejtoi hetimet gabim dhe shkatërroi shumë prej dosjeve duke i shërbyer politikës.
Ai deklaroi gjithashtu se ish-kryeprokurori Adriatik Llalla ka shkarkuar persona pa asnjë arsye, dhe gjithashtu ka emëruar persona pa asnjë meritë.
“Në përplasjet e mia me Llallën, që kam pasur kanë qenë çështje pasi ai largoi nga detyra gjithë profesionistët. Llalla ka shkatërruar karrierën e individëve në Prokurori. Këshilli i Prokurorisë në bashkëpunim me Llallën kanë emëruar individë pa meritë, dhe janë shkarkuar njerëz të aftë por postin që kishin. Ka prokurorë që janë ulur në detyrë pa asnjë arsyetim. Unë kam konsideruar se Prokuroria është një aset që në të duhej të punohej me dinjitet. Unë kam punuar në Prokurori për gati 25-vjet. Nuk është hera e parë që kam thënë që ai ishte i destinuar për shkatërrimin e karrierës, sepse sistemi ia dha atij këtë mundësi. Ai ka transferuar prokurorë. Janë shkarkuar njerëz të Prokurorisë pas asnjë shpjegim. Sot kemi një sistem që ka çaluar. Kjo situatë tashmë ka mbaruar, mandati i zotit Llalla ka përfunduar”.
Lidhur me qëndrimin e Llallës në zyrë, edhe pasi i ka mbaruar mandati, Hajdari është shprehur se ish-kryeprokurori ka vepruar mirë.
“Zoti Llalla ka bërë shumë mirë që ka shkuar në zyrë, sepse zyra e kryeprokurorit nuk mund të lihet bosh, derisa të zgjidhet një kryeprokuror i përkohshëm. Ai ka bërë shumë mirë që ka shkuar zyrë sepse aty ka dokumente që duhet të firmosen”.
Si përket pyetjes se a është përgjegjëse Prokuroria për çështje të bujshme, Hajdari konstatoi se “Llalla në dosjet konkrete i është vetëofruar politikës për të shkatërruar ose për të hetuar dhe drejtuar gabim.”
“Kjo është një histori që publiku shqiptar, ne profesionistët nëpër tavolina ia kemi gjetur përgjigjen, e cila është profesioniste. Politika ka përdorur zotin Llalla, dhe ky i fundit nëpër dosje konkrete i është vetëofruar politikës për të shkatërruar ose për të hetuar dhe drejtuar gabim. Ju keni dhënë fakte pa fund. Unë nuk kam ndërmend këtu në studio që të merrem me çështje konkrete. Janë shumë çështje. Sigurisht që Vettingu do të sqarojë shumë gjëra. Të jeni të bindur që dhe në përplasjet para tre vjetësh me zotin Llalla se asnjë nuk do t’i shpëtojë reformës në drejtësi”.
Por, ndër të tjera Hajdari u ka bërë thirrje kolegëve të tij të ndershëm që të kandidojnë për postin e prokurorit të përkohshëm.
“Për mua e rëndësishme është që të gjithë prokurorët që e shikojnë veten në ndershëm dhe të aftë të konkurrojnë për këtë post. Ndërsa asnjë nga drejtuesit e prokurorive s’mund të kandidojë për këtë post. Prania e OPDAT dhe EURALIUS është pozitive për reformën. Prania e dy misioneve pranë Komisionit të Ligjeve është e rëndësishme. Trupa e prokurorëve të ndershëm është e traumatizuar, për mënyrën se si është katandisur Prokuroria. Unë them që prokuroria ka njerëz të ndershëm dhe profesionistë. Pjesa më e madhe e Prokurorëve të rretheve kanë qenë vegla të kryeprokurorit Llalla. Ndaj asnjë prej tyre nuk mund të kandidojë për këtë post”, përfundoi në fjalën e tij Hajdari.
