Ish-drejtuesi i Prokurorisë së Apelit Tiranë, dhe njëherësh ish-kreu i Shoqatës së Prokurorëve, Shkëlqim Hajdari tha se kryeprokurori Adriatik Llalla uzurpoi Këshillin e Prokurorisë. I ftuar në emisionin “Arena” nga Dritan Hila në Ora News, Hajdari shpjegoi se prokurorët që bënin pjesë në Këshillin e Prokurorisë përfunduan në vegla që mbështesnin njëri-tjetrin dhe kjo është një histori që provohet lehtë me prova.
“Zoti Llalla që ditën e parë në masën më të madhe që ka bërë ka përzgjedhur me kujdes Këshillin e Prokurorisë. E uzurpoi plotësisht dhe përfunduan në vegla që mbështesnin njëri-tjetrin dhe kjo është një histori e provojmë me prova.
Me Llallën kemi pasur një marrëdhënie pune pasi kemi punuar në prokurorinë e Tiranës por edhe marrëdhënie shoqërore. Zoti Llalla nuk kishte predispozitën që organi i prokurorisë të ecte në atë rrugë që prokurorëve t’u rriteshin sa më shumë garancitë dhe si pasojë e lobimit të fortë të Shoqatës së Prokurorëve siguruam edhe dy ndryshime të rëndësishme ligjore. E para, çdo prokuror që shkarkohej me dekret nuk kishte të drejtën e ankimimit.
Ka dështuar sistemi i centralizuar i prokurorisë dhe zoti Llalla nuk është përgjegjës për atë sistem. Mendoj se reforma është një hap shumë pozitiv” deklaroi Hajdari.
