Komisioneri për Zgjerimin në BE, Johannes Hahn, i cili është pjesë e takimit informal të liderëve të Ballkanit, ka shkruar në Twitter se ky takim shton dinamikën e muajve të fundit.
“Takimi i liderëve të sotëm në Durrës, shton dinamikën pozitive që kemi dëshmuar gjatë muajve të fundit në lidhje me Europrespektivën e WesternBalkans. Zona Ekonomike, Regionale do të nxisë rritjen ekonomike, vendet e punës dhe prosperitetin e rajonit përgjatë rrugës për anëtarësimin në #EU”.
Integrimi ekonomik do të jetë në fokus të takimit informal që po zhvillohet sot në Durrës mes komisionerit për Zgjerimin, Johannes Hahn dhe Kryeministrave të shteteve të Ballkanit Perëndimor.
Sikundër u njoftua edhe më herët nga zyra për shtyp e Kryeministrisë, temë e diskutimit mbetet vizioni i përbashkët mbi Strategjinë e Integrimit në Bashkimin Europian, zbatimi dhe fuqizimi i zonës ekonomike rajonale, marrëveshja roaming dhe fillimi i negociatave për marrëveshjet e njohjes reciproke të kualifikimeve akademike dhe profesionale.
