Negociatat për në BE do të shtyhen për në qershor të 2019-ës. Kështu ka deklaruar komisioneri europian për Zgjerimin, Johannes Hahn. Në një mesazh në “Twitter” ai shprehu kënaqësinë që KE sheh më në fund dritë mbi konkluzionet e zgjerimit.
“Rrugëtimi drejt hapjes së bisedimeve të anëtarësimit në qershor të vitit 2019 është i qartë. Një sinjal kyç ky për rajonin se progresi i bërë shpërblehet, sikurse edhe vendimtar për besueshmërinë e vet BE-së”, shkruan Hahn.
Kryediplomatët e BE-së vendosën se do ta japin “dritën jeshile” vitin e ardhshëm, e jo tani siç shpresonte Greqia, sidomos pas marrëveshjes me Shkupin për çështjen e emrit.
Ministri i Jashtëm grek, Nikos Kotzias tentoi të qetësonte kolegët për Shqipërinë dhe Maqedoninë dhe tha se këmbënguli se situata gjeopolitike dhe gjeostrategjike në rajon kërkon mbështetje dhe jo shtyrje për të dyja vendet.
“Ishin dy linja të ndryshme, në njërin krah një shumicë prej 25 vendesh, që duan të hapin negociata me Shqipërinë dhe ish-Republikën jugosllave të Maqedonisë deri verën e 2019-s, e në krahun tjetër Danimarka, Franca dhe Holanda, që duan të shtyjnë negociatat”, tha Nikos Kotzias.
Diplomatë europianë, në kushte anonimiteti konfirmuan se Shqipëria ka ende për të treguar në reformat kyçe para se të marrë hapjen e negociatave. Ndërsa për Maqedoninë theksuan se nuk mund të mbyllin sytë për procesin e anëtarësimit, vetëm sepse u zgjidh çështja e emrit me Greqinë.
