Me Greqinë jemi ende në luftë që prej tetorit të vitit 1940, kur u sulmua prej Italisë fashiste nga territori i pushtuar shqiptar. Por përplasja direkte mes 2 vendeve ka ndodhur në gushtin e 1949-ës. Greqia ishte në fazat e fundit të luftës civile, mes forcave nacionaliste dhe komuniste.
Mbeturinat e këtyre të fundit u pozicionuan në fund në kufirin me Shqipërinë, dhe u ndihmuan nga regjimi i Enver Hoxhës. Për këtë arsye, ushtria greke e sulmoi Shqipërinë më 2 gusht 1949 në zonën e Devollit me 70 mijë ushtarë, 50 avionë, 80 tanke dhe 400 topa.
Autoritetet shqiptare mobilizuan direkt në luftime rreth 10 mijë ushtarë, ndërsa mbajtën në gatishmëri rreth 30 mijë trupa. Grekët arritën të depërtonin deri disa qindra metra në tokën shqiptare, ndërsa bombarduan disa fshatra kufitare.
Luftimet përfunduan më 14 gusht, me tërheqjen e trupave greke që sipas burimeve shqiptare lanë 300 ushtarë ta vrarë, 500 të plagosur dhe 270 robër. Ndërkohë ushtria shqiptare pati 29 ushtarë dhe oficerë të vrarë, teksa u plagosën 127 të tjerë.
