Ish-kryeministri i Maqedonisë, Nikolla Gruevski ka komentuar qeverisjen 100 ditore të LSDM-së dhe partive të tjera në pushtet.
Gjatë fjalës së tij para medieve, Gruevski tha se nuk janë realizuar pritjet e tij për integrimin e vendit në NATO dhe fillimin e bisedimeve me BE-në, si dhe nuk është realizuar asnjë projekt i rëndësishëm, duke ndikuar negativisht ne ekonominë e vendit.
“Kaluan pothuajse 100 ditë me gënjeshtra, paaftësi, kaos dhe përçmim. Njëqind ditë me ndërprerje dhe bllokim projektesh, fundosje ekonomike, huamarrje, papunësi dhe gjëra të tjera të rëndësishme dhe të pamenduara. Fermerë të pakënaqur, pensionistë të zhgënjyer, rini e mashtruar, ndjenja kombëtare dhe dinjitet kombëtar të tradhtuara, shoqata të biznesmenëve dhe sindikata të vendosura në margjina, punëtor të harruar dhe asnjë, përsëris, asnjë projekt përmbajtjesor, serioz dhe thelbësor i cili do të japë shpresë të cilido se të paktën ndonjë gjë do të jetë mirë me këtë qeveri të re”, tha Gruevski, ndërsa shtoi se ky makth mund të përfundojë më 15 tetor.
