Deputetja e Partisë Demokratike, Grida Duma nuk ka ngurruar të thumbojë të larguarit nga partia. Madje, ajo i ka akuzuar ata drejtpërdrejt se zgjodhën rrugën e pushtetit.
Teksa foli gjatë punimeve të Kuvendit Kombëtar të PD-së, deputetja tha se demokratët nuk kanë vajtur në luftë vetëm me kundërshtarin, por një pjesë e tyre kanë bërë mëkate duke tradhtuar njerëzit e tyre.
“E nisa dhe do e vazhdoj me demokratë se është e rëndësishme të themi që ju nuk keni vuajtur vetëm luftën e kundërshtarit, keni parë demokratë drejtuar drejt pushtetit, kanë zgjedhur rrugën tjetër, duhen ndërtuar mundësitë e drejta që të flihet gjumë pa mëkatin që ke tradhtuar tëndin”, u shpreh Duma.
Duke u ndalur tek protestat, demokratja tha para delegatëve se Partia Demokratike është e ardhmja e studentëve dhe të rinjve, dhe se do të jetë gjithmonë përkrah tyre.
“Miqtë e mi, e ardhmja e studentëve dhe të rinjve jemi ne. E ardhmja e tyre jemi ne.
I riu dhe i vjetri duan të bëjnë Shqipërinë, të pakompleksuar nga politika dhe nëse PD është në krye të protestave ose jo ne jemi në krye të forcës së të ardhmes, megjithëse durojmë goditje dhe na thonë për çdo gjë që nuk bën qeveria e ka fajin opozita, të mbledhin mendjen, janë aq të aftë sa duhet ti drejtohen opozitës se është aq e fortë.
E di sa janë dyshuar demokratët, kur i thonin pse nuk jeni të aftë të vidhni, fituan ata, pse nuk e morët me çdo mjet votën. Ju jeni me një trup 300 e ca numrash dhe duhet të dini që PD duhet të ekzistojë për shoqërinë, për ata studentë që duhet ta shohin shpresën këtu.
Kur ta fitojmë ta kemi fituar me kokën lart pa na thënë dikush i folët, por sepse jemi të fortë dhe e meritojmë”, ka deklaruar Duma.
