Mesfushori me tipare sulmuese i kombëtares shqiptare, Eros Grezda është duke kaluar një formë fantastike dhe kjo ka bërë që të ndizet merkato e janarit edhe për të. Falë paraqitjeve të mira me kombëtaren dhe me ekipin kroat të Osijek, ai ka marrë vëmendjen e disa ekipe europiane. Mediat kroate raportojnë se e ardhmja e Eros Grezdës do të jetë në Itali, por nuk bëjnë të ditur se kush ekip e kërkon konkretisht.
Drejtuesit e Osijek do të bien dakord vetëm në rast se për Grezdën do të ofrohet vlera e kartonit të tij, ndryshe ai do të vazhdojë të qëndrojë në ekip. Edhe pse nuk ka asgjë zyrtare zërat janë të fortë dhe flitet që aventura e tij në Kroaci do të përfundojë që në janar. Grezda cilësohet si një element shumë cilësor, kjo falë shpejtësisë dhe si një lojtar paparashikueshëm në duelet direkte.
Nëse destinacioni i tij do të jetë Serie A, flitet që klubet më të interesuara janë Genoa dhe Lazio, të cilët muaj më parë kishin kërkuar informacione për lojtarin. Fakti që Igli Tare, drejtori sportiv i Lazios është shprehur se po punon për të afruar një lojtarë tjetër shqiptar tek ekipi italian, të bën të besosh se ai është Grezda. Sulmuesi kuqezi momentalisht me fanellën e Osijek ka zhvilluar 17 takime ku ka arritur të shënojë 4 gola. Ndërsa me fanellën e kombëtares kuqezi arriti të shënonte golin e tij të parë, në testin miqësor ndaj Turqisë.
