Glasgow Rangers ka qenë mjaft aktiv në merkaton e verës që nga momenti që në stol u ul Steven Gerrard. Ata kanë afruar 12 lojtarë dhe janë duke u përgatitur që të kthehen në majën e futbollit në Skoci. Por që të ketë një ekip të plotësuar legjenda e Liverpool i ka kërkuar klubit që të afrojë edhe Eros Grezdën.
Ditën e sotme mediat skoceze raportojnë se mesfushori i kombëtares shqiptare ka udhëtuar për në Skoci, ku ka kaluar me sukses testet mjekësore, ndërsa tani pritet vetëm që të hidhen firmat dhe zyrtarizimi.
Për hapin e fundit duket se është bërë klubi i Osijekut, pavarësisht se ka rënë dakord me Ranges për shumën që do të përfitojë, kërkon edhe një klauzolë që ka qenë pjesë e kontratës së shitjes.
E vetmja gjë që mban peng mbylljen e negociatave është fakti se klubi i Osijekut, kërkon të mbajë 20% të kartonit të Grezdës, për të përfituar përsëri, nëse skocezët e shesin në një të ardhme. Pala e Rangers nuk është e gatshme që të lejojë një përqindje kaq të madhe ta mbajë Osijeku. Gjithsesi, sapo të zgjidhet edhe kjo “nyje”, “Scottish Sun” raporton se pritet që zyrtarizimi të kryhet mbrëmjen e sotme.
