Greqia zhvillon nesër një tjetër grevë 24 orëshe. Pritet që i gjithë shteti helen të jetë në një kaos të vërtetë. Kryeqyteti Athinë pritet të jetë më i rënduari sepse asnjë nga mjetet e transportit nuk do të funksionojë.
Ndërkohë, shumë fluturime të linjave të brendshme nuk do të kryhen të hënën, ndërsa do të ketë ndryshime orari për dhjetëra linja të tjera, përfshirë ato ndërkombëtare.
Theksohet se greva organizohet nga dy unionet më të mëdha sindikale në vend që përfshijnë punonjësit e sektorit publik dhe të atij privat.
Sindikalistët nënvizojnë se paketa e re e masave “do të shpërbëjë edhe ato mbetje të pakta të shtetit social që kishin shpëtuar gjatë viteve të krizës”.
Kjo grevë do të zhvillohet në ditën që parlamenti grek do të ftohet të votojë paketën e masave të reja shtrënguese, si kusht për çlirimin e kësteve të mbetura nga 86 miliardë eurot që kanë ofruar kreditorët ndërkombëtare për shpëtimin e vendit.
Sindikalistët i ftojnë punonjësit e të gjithë vendit që t’u bashkohen protestave, “për të shprehur kundërshtimin ndaj politikës anti popullore të qeverisë”.
