Kryetari i Bashkisë së Vorës, Agim Kajmaku i ka dërguar një letër Prokurores së Përgjithshme të Përkohshme, Arta Marku, në të cilën nënvizon se është në pritje të te dhënave me shkrim nga Prokuroria në Greqi për rrethanat e ndonjë urdhri ndërkombëtar kërkimi në emrin e tij.
Letra e tij vjen pas një prononcimi për mediat nga Gazment Bardhi, i cili u shpreh se denoncimi i PD-së në adresë të Kajmakut është provuar zyrtarisht nga Prokuroria e Përgjithshme.
Nga ana tjetër, Kajmaku qartëson se nuk ka pasur dijeni që në ngarkim të tij ekzistonte një çështje penale e pezulluar nga autoritetet përkatëse të distriktit të Artës. Ndërsa thekson se është paraqitur menjëherë pranë autoriteteve përkatëse greke dhe ka kërkuar informacion.
“Pavarësisht vendimit të pafajësisë së sipërpërshkruar, unë kam kërkuar dhe jam në pritje të të dhënave me shkrim nga ana e Prokurorisë pranë Gjykatës së Apelit të Krimeve të Rënda, Janinë, Greqi për rrethanat e marrjes së ndonjë mase sigurimi apo ndonjë urdhri ndërkombëtar kërkimi me emrin tim për këtë rast dhe në momentin që do t’i administroj, do t’ua vë në dispozicion së bashku me vendimin e plotë të zbardhur të pafajësisë nr. 236, datë 12.09.2019 si edhe do t’i pasqyroj ato edhe në dokumentin përkatës sipas ligjit”, thuhet mes të tjerash në letrën e Kajmakut.
Po ashtu, kyebashkiaku i Vorës i ka vënë në dispozicion Arta Markut edhe një dokument të Gjykatës së Apelit për Krimet e Rënda të Janinës, ku pretendon se është shpallur i pafajshëm.
