Duke marrë shkas nga temperaturat rekord në Greqi, autoritetet kanë dhënë urdhër për ndalimin e punës në sektorët e rrezikuar, në orët e drekës. Mediat në Greqi raportojnë se Ministria e Punës ka njoftuar qytetarët, për masat mbrojtëse.
Dy qarkoret e shpërndara sot, parashikojnë pezullim të punës për grupet e cënueshme nga orari i pikut, nga ora 12:00 deri në 16:00. Po kështu, Ministria e Punës apelon ndaj punëdhënësve të marrin masat e nevojshme teknike dhe organizative, për ndërprerjen e punës në këtë orar.
Greqia prej disa ditësh është goditur nga një mot i nxehtë, që ka sjellë edhe zjarre në disa zona të ndryshme të vendit.
Të hënën temperaturat pritet të arrijnë kulmin në nivel lokal, duke kapur vlerat e 47 gradë celsius. Ekspertët thonë se kjo valë e të nxehtit është një ndër më ekstremet në vitet e fundit, dhe konsiderohet si historike.
E hëna dhe e marta konsiderohen ditët më të vështira, ndërsa rënia e lehtë nis nga e premtja në Greqinë perëndimore, qendrore dhe veriore. Fundjavën e ardhshme temperaturat pritet të zbresin deri në 36-37 gradë celsius.
