Ashtu siç u tha më parë, tashmë nuk ka asnjë dyshim: sulmi ndaj policisë shqiptare në fshatin Bularat ka qenë i planifikuar. Këtë e dëshmon një foto e publikuar nga historiani Arben Llalla, ku shfaqet një grup ushtarësh grekë që mbështetën Kaçifas dhe e ndihmuan të largohet në drejtim të Greqisë.
Sipas Llallës, Kaçifas është njeriu i trupave speciale të ushtrisë greke. Ai vijon të kërkohet nga RENEA dhe helikopterë, pas sulmit me armë ndaj policisë, pikërisht në ditën e festës së Greqisë.
Në një tjetër postim të bërë vetëm pak minuta më parë, Llalla nxjerr një tjetër foto, ku shkruan se ekstremisti shpalosi në jug të Shqipërisë flamurin e Autonomisë greke. “Skenar i përgatitur mirë nga sigurimi grek, mos u gënjeni se ka probleme psikologjike Kaçifas”, shkruan ndër të tjera historiani.
Kaçifas është ekstremist pro Greqisë, i cili qëndrimet e tij i ka publikuar herë pas here në profilin e tij në Facebook. Madje, në një nga postimet, ai shkruante:
“Rama dhe Tsipras bëjnë plane pa të zotët e shtëpisë. Për një gjë të jeni të sigurt. Rinia e Vorio Epirit nuk do të qëndrojë spektatore. Thirren të gjithë grekët e Vorio Epirit që në 28 Tetor të dërgojnë një mesazh në çdo anë. Grek ose vdekje!”
