30-vjeçari Adolf Gjaci, ka rënë në pranga pasi akuzohet se ka tentuar të grabisë shtëpinë e Arben Çepeles, ngjarje e ndodhur më 10 shkurt të këtij viti.
Mësohet se Gjaci, banues në Mirditë, është arrestuar tetë ditë pas ngjarjes së rëndë ku mbeti i plagosur edhe kushëriri i Çepeles.
Bashkë me tre persona të tjerë, Gjaci u fut për herë të dytë në shtëpinë e Arben Çepeles në Roskovec dhe tentoi ta grabiste.
“Si rezultat i vlerësimit maksimal të kësaj ngjarjeje është kapur dhe vënë në pranga, për veprat penale “Vjedhja me armë” e kryer në bashkëpunim, e mbetur në tentativë, “Plagosja e rëndë me dashje” dhe “Armëmbajtja pa leje”, shtetasi: A. Gj., 30 vjeç, banues në Mirditë (i proceduar penalisht më parë për “Shkatërrim prone”, “Dëmtime të tjera me dashje”, “Kanosja” dhe “Armëmbajtje pa leje”, si edhe i dënuar më parë në Angli, për “Prodhim dhe shitje të narkotikëve”).” informon policia.
Grupi hetimor, në bashkëpunim me Prokurorinë e Rrethit Gjyqësor Fier, vijon punën për identifikimin dhe kapjen e autorëve të tjerë të përfshirë në këtë ngjarje.
