UPDATE* Gjykata për Krime të Rënda caktoi “Arrest me burg” pa afat për Alkond Bengasin, një nga të dyshuarit si autor i grabitjes në Rinas. Bengasi ka mbajtur qëndrim mohues fillimisht në lidhje me akuzat e ngritura, por më pas ka pranuar të bashkëpunojë duke folur me emra dhe duke treguar detaje për grabitjen spektakolare. Bengasi është i arrestuari i parë, që pritet të përfitojë nga bashkëpunimi me drejtësinë.
-Grabitja e miliona eurove, del para gjykatës një prej të dyshuarve
Ka nisur te Krimet e Rënda seanca për caktimin e masës së sigurisë ndaj Alkond Bengasit, një prej të arrestuarve i dyshuar për grabitjen e parave në Rinas, më 9 prill.
Seanca po zhvillohet me dyer të mbyllura. Në sallë janë edhe dy prokurorët e dosjes, Arenc Çela dhe Klodian Braho, të cilët do të kërkojnë “Arrest në burg”.
Prokuroria dhe policia zhvilluan hetime për 14 ditë me radhë për zbardhjen e grabitjes. Deri më tani janë arrestuar 4 persona dhe janë shpallur në kërkim 2 të tjerë.
Në një deklaratë zyrtare, Policia e Shtetit pohoi se ka prova të mjaftueshme për zbardhjen dhe kapjen e të gjithë autorëve të përfshirë në grabitjen e disa milionë eurove.
