Një roje private pranë Postës së Krujës ka rënë në prangat e policisë, pasi akuzohet për kryerjen e veprave penale “Moskallëzim krimi” dhe “Shpërdorim detyre”. I arrestuari identifikohet si Besnik Parruca, banues në Durrës.
51-vjeçari nuk ka njoftuar efektivët e policisë për vjedhjen me thyerje të kasafortës së Postës së Krujës. Prej nga ku grabitësit kanë arritur të marrin një sasi prej rreth 11 milionë lekësh dhe një sasi valute. Sipas rojes, ai është kërcënuar nga grabitësit, e për këtë arsye nuk ka njoftuar.
Për këtë rast, në kërkim është shpallur edhe specialisti i sallës së SHPSF-ve, 28 vjeçari me iniciale S.T., banues në Tiranë. Dyshohet se ka shpërdoruar detyrën duke mos njoftuar Policinë e Shtetit.
Sakaq, grupi hetimor po punon për identifikimin dhe kapjen e autorëve. Materialet i janë referuar Prokurorisë pranë Gjykatës së Shkallës së Parë Krujë, për veprën penale “Vjedhje me dhunë e kryer në bashkëpunim”.
