Gjykata e Posaçme ka dhënë vendimin për anëtarët e grupit kriminal që akuzohen për grabitjen e Rinasit. Klement Çala është dënuar me 20 vite burg, ndërsa Eldi Çala me 17 vite burg.
Ata do ta vuajnë dënimin në një burg të sigurisë së lartë sipas GJKKO. Anëtarët e tjerë të grupit, Oltian Veseli, Renaldo Sula, Saimir Çela, Elton Pikli dhe i penduari i drejtësisë Alkond Begasi janë dënuar me nga 17 vite burgim.
Kujtojmë këtu se Klement dhe Eldi Çala, dy vëllezërit e shumëkërkuar për grabitjen e 4.6 milionë eurove në Rinas, u arrestuan në një banesë të marrë me qira në Qerret të Kavajës. Policia e Shtetit, dy vite më parë njoftonte se dy vëllezërit u prangosën nga ENFAST, RENEA dhe departamenti i Policisë Kriminale.
Për të realizuar kapjen e tyre u organizuan plot 300 forca policore, përfshirë EnFAST, RENEA dhe efektivë nga Tirana, Durrësi, Elbasani dhe Kavaja. Gjatë kontrollit në shtëpinë e marrë me qira prej tyre, policia gjeti dhe sekuestroi 3 pistoleta, 3 automjete tip Audi A 4-6-8, dy motorë BMV 1200 GS, dhe 133.960 euro. Ata u shpallën në kërkim për grabitjen e 4.6 mln eurove më 10 prill 2019.
