Një grup shqiptarësh që ka bastisur shtëpi të ndryshme cilësohen nga mediat italiane si më të rrezikshmit në Evropë. Anëtarët e grupit në fjalë janë të afërmit shoferit famëkeq të “Audi-t të verdhë” që u kalli datën gjithë banorëve në verilindjen e Italisë dimrin e kaluar, duke kryer grabitje të shumta dhe duke u larguar më pas me shpejtësi.
Grupi i strukturuar i grabitësve nga Shqipëria shihet si më i rrezikshmi në Evropë, pasi sipas mediave të shtetit fqinj ata i kanë shpëtuar disa herë prangave të policisë, madje duke u hedhur edhe nga lartësi marramendëse. Ndërsa i kanë shpëtuar ndjekjes së policisë si në skenat e filmave aksion.
Pas një hetimi intensiv, karabinierët e Padovës shkatërruan organizatën e grabitësve e cila nuk e kishte për gjë të bastiste shtëpitë edhe në prani të pronarëve që binin viktima të këtij grupi. Edhe Verona ra pre e këtyre grabitësve, ku verilindja e Italisë ishte epiqendra e vjedhjes. Ndërkohë që vepronin në të gjithë Evropën, shkruan TgVerona.
Grupi i grabitësve përbëhet nga Bledar dhe Ismail Balozi, Ergis Rama, Kelion Stafa, Eduart dhe Fatbardh Xaka. Ky është një grup me lidhje farefisnore. Në zhargonin e tyre karabinierët ishin të “zinjtë”. Ata terrorizonin familjarët ku bastisnin shtëpitë me anë të shtënave me armë dhe talleshin me “viktimat” e tyre që binin pre e vjedhjeve. Ndërsa largoheshin me shpejtësi “rrufe” nga vendi i ngjarjes.
Policia iu ka sekuestruar atyre rreth 200,000 euro. Ndërsa është në kërkim të 20 të tjerëve që mendohet të jenë të lidhur me bandën e shqiptarëve që u kthye në tmerrin e italianëve. TIRANA TODAY
