Gor Mahia dhe Tirana nuk kanë arritur ende marrëveshjen për transferimin e Kenneth Mugunës. Kenianët kanë akuzuar klubin e Tiranës se “po bën lojëra”, pasi nuk ka paguar shumën e 40 mijë dollarësh që duhen për të liruar mesfushorin. Ndërsa sa i përket lojtarit tjetër Musa Mohammed gjithçka është e qartë, pasi lojtarit i ka përfunduar kontrata me klubin dhe nuk ka preferuar ta rinovojë.
Kontrata e Musa Mohammed me Gor Mahian përfundoi ditën e hënë, ndërsa Muguna ka ende dy vjet kontratë me klubin kenian. Ndërkohë, Gor Mahia i ka dërguar një letër klubit të Tiranës më datë 5 janar. Kreu i klubit të Gor Mahias, mësohet se ua ka bërë të qartë drejtuesve të 24 herë kamionëve të Shqipërisë se nëse nuk paguhet shifra prej 40 mijë dollarësh për Mugunën, atëherë transferimi do të bllokohet.
“Përmes kësaj letre i drejtohemi presidentit të Tiranës, të cilit me respekt i këshillojmë se do të vazhdojmë me finalizimin e procesit të transferimit, pas pranimit të shumës së dakorduar”, thuhet në letrën e klubit të Gor Mahias drejtuar klubit të Tiranës.
Zëvendës-sekretari i përgjithshëm i Gor Mahias, Ronald Ngala tha se kjo letër ka mbetur pa përgjigje, edhe pse Tirana është përpjekur të marrë Certifikatën Ndërkombëtare të Transferimit për Mugunën.
“Tirana është duke bërë lojëra. Muguna ishte shumë i shtrenjtë dhe ai ende ka një kontratë me klubin. Gjithashtu ka marrëveshje me Western Stima, klubi mëmë i lojtarit, që ka të drejtën për një tarifë të caktuar nga çdo transferim që ai bën. Si mund ta lëmë ne që të largohet falas? Unë jam i shqetësuar, sepse e gjithë kjo mund të ndikojë në karrierën e Mugunës, pasi për momentin ai nuk është as këtu e as atje. Nëse do të ishin seriozë, ata duhet të kishin nënshkruar me Mugunën tashmë”, tha Ngala për “AllAfrica”. Muguna dhe Mohammed kanë kërkuar lirimin e tyre nga Gor Mahia për t’iu bashkuar Tiranës, që drejtohet nga ish-trajneri i skuadrës keniane, pikërisht, Ze Maria.
