Detektivët në Dubai do të pajisen me syze inteligjente Google Glass, të cilat konsistojnë në teknologjinë e njohjes së fytyrës.
Kështu, pajisja ka një ekran të vogël kompjuterik të montuar në cepin e kornizës së syzeve, i cili është i aftë të shkrepë foto, të regjistrojë video dhe të luajë muzikë.
Sipas zëdhënësit të policisë në Dubai, softueri i krijuar nga policia, do të bëjë të mundur lidhjen e syzeve me bazën e të dhënave të personave që janë në kërkim.
Nëse pajisja njeh një të dyshuar duke u bazuar te pamja e tij, ajo i dërgon përdoruesit një sinjal.
Fillimisht kjo pajisje do të përdoret për të ndaluar ata që shkelin rregullat e qarkullimit, ndërsa më pas do të përdoret nga detektivët.
Kjo pajisje kushton rreth 1.500 dollarë, ndërsa Departamenti i policisë në Dubai njihet për investimet e shumta për punonjësit e saj.
