Gjyshi i autorit të masakrës së Vlorës, Kujtim Zykaj ka rrëfyer gjithë tragjedinë që ndodhi dje në Selenicë, ku nipi i tij, Ridvan Zykaj vrau me kallashnikov 8 persona të një fisi.
Kujtim Zykaj ka dhënë dëshmi rrëqethëse duke rrëfyer detajet e krimit makabër.
Në derën e shtëpisë, gjyshi mes ngashërimesh tregon se ai vetë, vëllai Demiri, dy nuset dhe nipat si dhe familja e Ridvanit ishin në një drekë familjare kur një nga nuset e ka akuzuar 24-vjeçarin se i kishte vjedhur kaposhët e detit.
“Këtu vija pasdite, vija në mëngjes. Nuk kishte konflikte. Më është vrarë vëllai me djemtë, mbesa e nusja. Nuk kishin konflikte”, thotë i moshuari.
I pyetur se përse e ka bërë këtë, plaku i familjes Zykaj thotë: “Ja për të më bërë gropën mua”.
“Në drekë një nga nuset i tha që më ke marrë kaponjtë e detit. Hëngrëm dhe drekën dhe u çua. I thashë ku do vesh, më tha do çoj dhentë në stan. Prindërit i shkuan nga pas. Erdha dhe unë, nuk gjeta njeri në shtëpi.
Erdha tek byrazeri e gjeta përmbys. E rregullova, gjeta dhe gruan i ujdisa. Pastaj gjeta nuset. (Ngashërehet) Të tërë i gjeta përjashta. Ulërija, por më kot. Pastaj shkoj tek nipolli i vogël. Ajo ishte kujë e zezë”, tregon gjyshi i autorit, për News 24.
