Ardian Dvorani është gjyqtari i gjashtë i Gjykatës së Lartë, që do të kalojë në sitën e Vettingut. Ajo që bie në sy lehtësisht në deklaratat periodike të pasurisë për Dvoranin, janë detyrimet nga palët e treta. Dvorani ka deklaruar një apartament në Tiranë, blerë me kredi në vlerën 34,410 dollarë. Nga këto i kanë mbetur për të shlyer 19 mijë dollarë. Afati i kredisë është deklaruar 20 vjet. Gjithashtu, ai ka deklaruar pagën si gjyqtar i Gjykatës së Lartë, në vlerën 1,680,672 lekë.
Dvorani ka deklaruar edhe shpërblim për mësimdhënien në një shkollë të lartë jopublike në vlerën 434,865 lekë. Më pas, në vitin 2012, Dvorani deklaron edhe detyrime të shlyera nga një palë e tretë në vlerën 2,016,983 lekë, sipas vendimit të Gjykatës së Rrethit Gjyqësor Tiranë, për dëmshpërblime pas zbritjeve të shpenzimeve gjyqësore. Sa u përket familjarëve, Dvorani ka deklaruar edhe të ardhurat e së shoqes në vlerën 1,091,986 lekë, si drejtore e një kompanie sigurimesh në Tiranë, raporton ‘Panorama’.
Në vitin 2013, Dvorani ka deklaruar sërish pagën si gjyqtar i Gjykatës së Lartë, në vlerën 1,685,436 lekë, shpërblime nga mësimdhënia si pedagog pranë së njëjtës shkollë të lartë jopublike në vlerën 250,560 lekë, interesa bankare në vlerën 18,286 lekë nga llogari rrjedhëse në bankë të nivelit të dytë; interesa bankare në vlerën 71 dollarë të depozitës në të njëjtën valutë.
Ai gjithashtu deklaron një borxh prej 1,350,000 lekë të marrë nga prindërit e tij, më datë 29.03.2013, pa këste, pa interes dhe pa afat.
Ky borxh është marrë për interes të shlyerjes së kredisë. Ai gjithashtu ka deklaruar edhe detyrime të paguara në vlerën 1 761 522 lekë, si shlyerje e menjëhershme e kësteve për blerje apartamenti, me çmim blerje 34,410 dollarë.
Gjithashtu, bashkëshortja e tij, Edlira Dollaku, ka deklaruar pagën dhe shpërblime si drejtore e Degës Tiranë pranë INSIG sh.a., në vlerën 90 006 lekë si dhe pagesën e dëmshpërblimit për largimin e padrejtë nga puna, sipas vendimit të Gjykatës së Apelit Tiranë 3,412,000 lekë.
Në vitin 2014 ka deklaruar të ardhura nga paga si gjyqtar i Gjykatës së Lartë, 1,595,860 lekë, të ardhura nga mësimdhënia, si pedagog i jashtëm në universitet jopublik në vlerën 32,5382 lekë dhe 213,058 lekë.
Këtë herë, Dvorani deklaron të ardhura nga mësimdhënia si pedagog edhe në Shkollën e Magjistraturës në vlerën 27,002 lekë dhe në Shkollën e Avokatisë në vlerën 144,000 lekë, si edhe 3,750 euro pagesë për një projekt të OSBE-së.
Bashkëshortja ka deklaruar të ardhura nga paga dhe shpërblime nga puna si drejtores së përgjithshme të kompanisë private të sigurimeve në masën 1,137,944 lekë dhe shpërblime si anëtare e Bordit të Byrosë shqiptare të Sigurimeve, 1,800,000 lekë.
Në vitin 2015, Dvorani ka deklaruar pagën si gjyqtar, 1,576,316 lekë, pagesat si pedagog në disa universitete dhe në Shkollën e Magjistraturës në vlerat 137,581 lekë, 163,360 lekë dhe 255,000 lekë.
Bashkëshortja Edlira Dvorani ka deklaruar paga dhe shpërblime si drejtore e përgjithshme e një kompanie private sigurimesh në vlerën 1,628,304 lekë dhe 2,040,000 lekë të ardhura si anëtare e Bordit të Byrosë Shqiptare të Sigurimeve. Ajo shton edhe një llogari rrjedhëse në vlerën 1,034,040 lekë. Në vitin 2016, Dvorani ka deklaruar 1,566,456 lekë të ardhura nga puna si gjyqtar dhe pagesa si pedagog i jashtëm në vlerat 19,660 lekë dhe 289,000 lekë.
