“I mora lekët borxh për kurim”. Me këtë argumentim, gjyqtari i Apelit Shkëlqim Miri ka kërkuar lirinë në Gjykatën e Apelit. Gjyqtari ka depozituar një ditë më parë, një kërkese për t’u liruar nga burgu.
Sipas burimeve nga akuza, gjyqtari ka deklaruar se paratë qe iu gjetën gjatë kontrollit në banesë, në momentin që edhe e shoqërua në polici, i kishte marrë borxhë për kurim. Ndërsa, Prokuroria e Krimeve të Rënda ka nisur hetimet për gjyqtarin Shkëlqim Miri.
Më 17 nëntor KLD pezulloi nga detyra gjyqtarin i cili akuzohet se kundrejt të ardhurave financiare ka ndihmuar në lirimin e Gentian Dodes, i dënuar për vrasje.
Ndërkohë prokuroria ka nisur hetim pasuror ndaj gjyqtarit. Pasi në banesën e gjyqtarit u gjetën rreth 300 milionë lekë.
Ndalimi
Gjyqtari u ndalua nga policia, pasi iu gjet shuma e parave në shtëpinë e tij. Një nga akuzat që mund të ngrihet për gjyqtarin është ajo e fshehjes së të ardhurave, parashikuar nga neni 180 i Kodit Penal. Gentian Doda ka qenë i ekstraduar kohë më parë nga Los Anxhelos, nga Shtetet e Bashkuara të Amerikës. Doda njihej si “kundërshtar” i familjes ‘Dedja’, një konflikt i njohur në Burrel mes dy familjeve.
Doda rrezikonte 20 vite burg për vrasjen e Gazmir Dedja dhe Asllan Gjoka, në tetor të vitit 1997.
Autori Gentian Doda dhe viktima Gazmir Dedja kanë qenë anëtarë të grupeve rivale në Burrel, konflikti ndërmjet të cilëve ka vijuar për shumë vite dhe me shumë viktima. Përpasjet e ashpra ndërmjet dy grupeve rivale janë shtrirë edhe në qytete të tjera.
Ditën e ngjarjes së vitit 1997, autori Gentian Doda dhe viktima Gazmir Dedja janë konfliktuar verbalisht dhe më pas, i pandehuri e ka qëlluar me automatik, duke e plagosur rëndë. Nga plumbat ka mbetur i vdekur aksidentalisht Asllan Gjoka. I plagosuri ka mundur të mbijetojë vetëm dy ditë për shkak të plagëve të marra, por ka arritur t’u tregojë familjarëve se kush e kishte qëlluar, duke identifikuar Gentian Dodën.
